Hakha Lungpi Chuntei

DALTHUMNAK

Bia Neknawi

Pu Hrang Vung Le Pu Hme Cem Hla an Phuahmi

( Thington aw)

1. Zudin Tluang Khawng nan vaal hawi mi aan hraang kun hna,

Cin Rung saang kai cu an lung lau lai, Sem i chaang u, Semlal,

Hmet Lian nan u nau.

2. In khawng kun hna nan vaal hawi nih maan zu dinah, ngai cel

hlah Ni Thluai ta...nang na than ei lai tluang hra dan ah.

3. Than cio i ruang hlah ngai thlanglei vai rang he in, zo nu tuanrel lio zong lung na hlau hna lo maw, tluang lip tler law zai do he.

4. Ramsa naiding buvel hovaang he, kum caanh ah than baang loin, ti tawn hna sam let khir an pei zong hrawng kua nih, tluang kio an len min chim lo phai lai hna.

5. Tluang Bawi hauhnar kik..lio Chum Er Dar Nawn taa, sem mawng paar bang in tlan hna dik maw, a thawng zaplio thli hran bang.

6. In tih awk ngai pa raan vaal mi nih, an hem lo vai bawi ser kawl siang hnuai i lak in, vun tiam Hmet Al lung thul lo.

7. Kawl Mang Bawi le, let khir caar zong an tling lo maw, thang Lai len min ca tial pum cung in, an tiam Thawng Hu tluang zeizat chim thli hran bang.

8. Dai hin hlah u Kio Cin daar cu vaan khuari bang, Mang sin Cuai Sang... Lal Tin Hmung len bil, pawkei sa he chum tual chung than faar van bang.

9. Leng ka maw le nan thiam tial cu thum tawn ai u, Dar Awi um kazoh zun Ni Taang taa, khua chuah lam caan kan cawng lai than...tlung ti hna.

10. Tin Cer chuah law nel rawn chum kut tiang thang ai law, nu hni thawi thum cawih cin tial laak sawm ai khir lio Bual Kung ah Lai ni bang chun.

Za Pau le Far Nawn Khuang Cawinak hla

1. Ra chuak cang u law ngeihhlei thihni le tial za he, Mang Hlei Cin Cawi le chum tual cungah, na thai Cer Hliang kai lai aa tim Khuang Par ah. ( Khuang Par le Cer Hliang min cu khuang cawinak i sak mi hla cuang an si.)

Ram Uk Bawi ( Sangtechung Lian Nawn) le Khenglawt pa Kong

Hlan lio ah hin Kheng Lawt pa nih arak uk lengmang hna. A Fapa Lian Nawn cu mino a si i, a sam aa zuah lio a si. Bual Pi tlang ah ram riah ah an kal. Kheng Lawt Pa nih an buuk sual tawnnak ah buuk rak sual u tiah a fial hna. a si nan, Lian Nawn nih cun hmun dang ah buuk cu a sual pi hna. Zaanlei buuk an tlun tikah  hmun dang pi ah a si kha Kheng Lawt pa nih a hmuh tikah a ho dah ka bia ngai duh loin, a ho nawl indah buuk nan sual tiah a ti hna. Cu tikah Lian Nawn nih cun kapa Keimah nawl in ka sual pi hna tiah a leh. Ngakchia fa nih a ti i, an pahnih in an i vel. Lian Nawn cu a Likuk a kiak. Cu caah Lian Nawn nihcun kuh thing a sah i, aa ser than. Kheng Lawt pa nih cun, Lian Nawn huham nih a ka tei cang arak ti. Cu caah Lian Nawn nih kan Uk cang seh tiah a ti caah cu hnu cun Hakha cu Lian Nawn nih a rak uk hna. Atu zong ah hin Bual Pi tlang ah cun Kheng Lawt Pa le Lian Nawn an i velhnak hmun tiah min an sak mi a um ko rih.

Kip Thlia (Sangte Chung hrin Kip Lian Nupi)

Kip Thlia cu Ai Ve Lungpi Chuntei Far a si. Kip Lian Nupi hmasa a thih hnu ah a thit mi a si. Van Tler an hrin i, cu caah Sangte Chung Van Tler hrin pawl cu Lungpi Chuntei hrin an si nak a si.

Pa Mua Hrin ( Sangte Chung) le Chuntei Pa Kong

Pa Mua cu Lian Nawn nau a hniang bik a si. Lian Nawn cu mi puar tuk a si caah Hakha arak hrem hna an ti. Cu tikah Khua upa pawl nih a kan hrem tuk, kan thah lai tiah Lian Nawn thahnak khua an rak khang. Pa Mua cu, Lian Nawn hi na tlaih khip lai i kan thah lai tiah an rak ti i, Pa Mua zong nih hna arak tlak pi hna.

A thaizing cu Lian Nawn thahnak ding ah meeting an tuah. An meeting tuahnak hmun cu Khuahlun Middle School a hlun zawn ( Bawi Hmun Nu Tili ) ah khin a si. Meeting an dih tikah Chuntei pa nih hi kan khuakhannak hi a dik lo tiah a ti i, a tlun pah ah Lian Nawn sinah a kal pah i, an khuakhannak kong cu a chimh dih. Nangmah cu na puartuk i na nau Pa Mua tu nih kan uk seh ti an duh caah a si tiah a chimh.

A thaizing cu Lian Nawn cu an auh tak tak. Ka ra ko lai tiah a ti hna. A autu an kal bak in a Sen Thlung puan a hnuai sawt, Pawngpi aa ponh, a phawpi a bei, Feipi a thunh i, lam hlat deuh ah a kal. A ra cang theu lai tiah Lian Nawn inn lei an cuanh lio ah khin an hnu lei in hlat nawn in a pel hna i, Maw Hakha hna aw... Sun Tla Ral an tlung ee... tiah a au i, a phawpi cu a khawn hnawh hna, afei cu a lek. An hei hmuh tikah ral an ra tak tak rua tiah an ruah caah Inn lei ah an tli dih.  Cu hnu cun, Lian Nawn nih Pa Mua cu, ka inn in kan chuah, thah a ka zaalmi na si tiah a ti i, a thawl ( Kan thih kan nun ah kan i co lai lo a ti an ti. ) Chuntei pa nih Lian Nawn hrin cu a khamh hna i, Lian Nawn nih cun thihnak in na ka khamh a ti i Ki-Kawng le Vok thau a thah an ti.

Sangpi Chung le Chuntei Arsa hrawmnak kong

Lungpi Chuntei le Sangpi Chung ( Za Thang hrin, Lian Kual hrin ) he Arsa kan i hrawmnak hi a sawhsawh in a si lo. Lai ral lio khua khat le khua khat an rak i tuk lio ah Sangpi Chung cu Chuntei Pa nih thihnak in a rak khamh. Cu caah Sangpi Chung Pa nih lung lawmhnak langhternak ca le dawtnak in Arsa arak hrawm hna. Cu ti cun Chuntei zong anrak hrawm ve hna.

Pi Far Nawn Kong

Pi Far Nawn hi Pu Za Pau ( Hrang Vung Pa ) Nupi a si. Khenglawt ( Van Pa Chung ) Bawihrin a si caah, Pu Kio Bil le a tefa hna zong nu lei in Khenglawt ( Van Pa Chung ) hrin an si nak a si.

Pi Ngun Vang Kong

Pi Ngun Vang cu, Pu Hrang Vung ( Kio Bil Pa ) Nupi a si.Hrang Lung chung Bawihrin a si. Cu caah Chuntei hi nu lei in a kan hringtu cu Hrang Lung Chung an si.

Pi Thla Hnem ( Khuang Par Nu )

Hakha Khuahlun Biakinn thar hla a phuah mi

1. Kau Tial ee, hrai le maan zu tlaih he, kha hlan pi pu sunlawinak hmun, cung Pathian nih nun chim cang maw.

2. Lai hlun ee, khua zung ceu lainak ah, mar bang zaanghrek rian tuan hna, nan len min chim kan baang lai lo.

3. Sangpar ee, thu Bawi Pathian sinah, thlaza kan cam nu hawi mi he, tu cu dawh khua dong cang lai.

4. Kan cha nee, ni a tha hawi dawt hna, ram chin vandeng hlum hrinhniang rual, cung van thluachuah relzia an thiam.

5. Cung hlum ee, khuakhang laireltu Bawi, Khrihfabu raithawinak he, thlum le al in kan cohlang ko.

6. Bong van ee, thluachuah phuntling te he, techin hrinhniang rual chan chuak tiang, lam kan hruai ko nun nem Bawipa.

7. Kam lo ee, chuncha bawng dir cang , maw Rungcin khua zung hlum kan sinah, Pa sunparnak lawng kan i lawm.

8. Biak Lian ee, Runinn dir lainak ah, khuachin tluang le phun hawi sinah, sui ngun chaw kan hal lio te kha.